Выраб велікодных вербаў (дэкарыраванне вербных галінак) – гэта адметная тэхналогія вырабу раслінна-кветкавых кампазіцый да Вербнай нядзелі. Гарадзенскія вербы з’яўляюцца святочным атрыбутам і, адначасова, сапраўдным творам народнага мастацтва. У сельскай мясцовасці свянцонай вярбой на Юр’я выганяюць жывёлу ў поле, а на Дзяды – адносяць на могілкі. Па каталіцкай традыцыі іх спальваюць у канцы Вербнай нядзелі наступнага года.

Сёння, акрамя хрысціянскага значэння, вербы маюць дэкаратыўны характар і часта служаць аздобай інтэр’ера жылля. Народны майстар Рэспублікі Беларусь Ірына Шавельская з аг.Гожа выкарыстоўвае для іх вырабу самыя разнастайныя па фактуры матэрыялы: каласы аўса і жыта, розныя травы (цімафееўка, мятлік і іншыя).

Створаныя велікодныя вербы па сваёй форме нагадваюць лісце паўднёвай пальмы,якім высцілалі шлях Хрыста падчас Яго ўваходу ў Іерусалім. Прамы ствол з пышнай верхавінай з’яўляецца сімвалам узыходжання і адраджэння.

27 сакавіка для работнікаў Індурскага цэнтра культуры прайшоў майстар-клас па вырабе велікодных вербаў з мэтай пераемнасці вопыту ў гэтым напрамку для ўключэння дадзенай справы ў работу аматарскага аб’яднання “Юная рукодельница”.

Народны майстар Рэспублікі Беларусь Ірына Шавельская расказала пра гісторыю велікодных вербаў, тэхніку вырабу, як правільна падрыхтоўваць і збіраць матэрыял, што кожная расліна сімвалізуе.