Унікальнае мерапрыемства “Адэльскі фэст” штогод праходзіць у Адэльску 13 чэрвеня ў дзень памяці святога Антонія Падуанскага, які лічыцца ахоўнікам аграгарадка.

Распачнецца фэст шэсцем з удзелам узорнага духавога аркестра Парэцкай ДМШМ і калектываў аматарскай мастацкай творчасці клубных устаноў Гродзенскага раёна. На галоўнай сцэне выступяць народныя калектывы з Мастоў і Ваўкавыска. Хэдлайнер мерапрыемства артыст беларускай эстрады Герман Цітоў.

На працягу свята будуць працаваць: кулінарная пляцоўка з дэгустацыяй страў нацыянальнай кухні, міні-пякарня “Агладкі па -адэльску”, этнафотазоны, экскурсія ў музейны пакой драўляных музычных інструментаў народнага майстра Рэспублікі Беларусь Мар’яна Скрамблевіча.

На дзіцячай пляцоўцы маленькіх гасцей свята чакаюць гульнявыя праграмы і пеннае шоў. Завершыцца фэст танцавальна-забаўляльнай праграмай.